التسعة غير أربعة, دخل للبيرو زاهيتله في النوار

عمار : السلام عليكم

زميله : عمار ؟ توة جاي ... تي شبيك وليت كركار ؟

عمار : اسمع ... خليني شايش و عامل بون كيف ...سألتك أنا وقالش شديت الخدمة

زميله : لا ...مش حكاية وقت ...تعرف احنا في مصلحة المقص ... مصالح الصبة في الايتاج الي فوق ...تبقى ... مش من عوايدك ... استانسنا بتمحريثك ...

عمار : هيهيهيهي ...تبدلت عليك امالا ؟

زميله : بالرسمي ... تي كنت أول واحد نلقاوه في البيرو و الله أعلم وقتاش كنت تخرج منه ... و توة شطر الوقت تعديه تتطلفح

عمار : هيهيهيهي ... ماني تهنيت عليهم ...

زميله : على شكون تحكي ؟؟؟

عمار : ايجا نوريك .... و الا تو نستعمل السيسيون متاعك بش نفسرك ...تراه أبعد الغادي

زميل عمار يبعد و يخلي كرسي بيروه لعمار و يجبد كرسي و يشد جنبه. عمار يبعول في الكمبيوتر ...

عمار : شوف ... هذيا نهار تدويني عام 2007...أقرى

زميله : الله الله ... تي هاو الدنيا قالبينها .... شوف هذايا شنوة يقول ... نزلت عليه ؟؟؟

عمار : بالطبيعة ... أما مش هذايا الأهم ...تبع مليح تلقاهم يد وحدة الكل ... شوف كيف نزلت على هذاكا شنوة صار من غدوة ...

زميله : أوف ... يصبرك ربي يا عمار يا خويا ... تي هاهم قردوك ...

عمار : في هاك الوقت ما تعرفش منين تشدها ... تجبد هذا يطلعلك الاخر ...

زميله : ايه و شنوة تبدل ؟؟؟

عمار : هات نشوفوا اليوم التدويني متاع البارح ... تفرج ...

زميله : تي شبيها الكلها ولات حاطة تصاور البيرة في مدوناتها ؟ بوبليسيتي ؟ و لاخر اش يخضرط في تو نرجعوا و تو نعمللكم .. و تحيا حماس ... اش مجيب حماس ؟؟؟ و لاخر ... تي شبيه ولا ضاربو في روحو ...و يحكي كان أنا ... أنا

عمار : شوف هنا

زميله : الله الله ... لا خلالوا و لا بقالوا ... مش كانوا صحاب هذوما

عمار : هيهيهي ... أي أي ... كانوا راسين في شاشية

زميله : ملا لعب تي هاي حرب أهلية ولات ...

عمار : وشكون ينجم يضرب كونجي ... في الحالة هاذي ؟؟؟

زميله : خويا عمار هيهيهيهي ...

عمار يتفتف أجيابه ... يتلفت الى زميله

عمار : بون هاني خارج ... ماشي للقهوة ... نجيبلك حاجو معايا ؟

زميله : لا ..صحة و بشفى

يهم عمار بالخروج ... من بعد يتلفت الى زميله مبتسم ابتسامة عريضة

عمار : على كل حال مادام فما ناس في البلاد ...يحكيو تحت حوايجهم في ديارهم خوفا أن يسمعوهم ... و مادام الي يقول كلمة حق يتلموا عليه العباد بش يسكتوه ... و مادام العباد تعس على بعضها والي يخرج عالمألوف يأكل الكفوف ...عمك عمار أموروا هانية ...

التونسي يحب الجلبانة و عندو عقلية جبانة

التونسي يموت عالملوخية و يقدر الاخوية*

التونسي يحب ياكل مرمز و تشيخلو كي يولي يرمز

التونسي يحب مرقة باطاطا و يخاف من ماكلة الصباطة

* الاخوية هوني بمعناه : خويا ... براس أمك ... عندك شعول ؟؟؟

قرر مجلس الزنوس بعد تفاقم ظاهرة "قطع ... انك في نورمالاند" و ظاهرة "البحر أمامكم و التمرميد وراءكم" و اللتان أثرتا سلبا على تجارة الكابوسان و الشيشة , قرر المجلس النسج على منوال بعض الدول لأستقطاب مواطنين جدد ...

ولذا وقع قرار أقامة حملة اشهارية لاقناع سكان العالم بأختيار نورمالاند كبلد يحلوا فيها التبلوليد.

و قد صادف صدور هذا القرار مع خلق نسيب رئيس مجلس الزنوس ... أطال الله في حساباته البنكية ... خلق شركة انتاج متخصصة في أنتاج الحملات الاشهارية لحساب الدول المهجورة من قبل مواطنيها و التي يبدأ أسمها ب "نورم"

ورُب صدفة خير من رَب صدفة.

و بعد أن حك سي نسيب رئيس المجلس روحو (و مش لازم نقوللكم شنوة حك بالضبط لسلامتكم) و دون تكليف نفسه تعب تشغيل اطارات متخرجة من المعاهد العلية (شكون باش يعبي فيراج فريقه المفضل من أولاد و شكون باش يتفرج في قناة نسيبوا لوخر من بنات ؟) بما أنه تبارك الله عليه , عين ما تضره , يفهم في كل شي من الفيزيك للبوليتيك و التاكتيك للأدعية بش ربي ينجيك الى تصدير الستيلو بيك و تصنيع ورقة البريك و حتى زادة التمنييك و قدمان الشريك و اخصائي زادة في علم التوليد و ال .... الانجاب

تي الحاصيلو ... حك روحوا و بعد ثلاثة دقائق و عشر أجزاء من صدور القرار ( و هو الوقت اللازم بش يترشف كاس القهوة متاعو و يضبط كرافاتو و يحط ساق على ساق و يحمحم) كانت الحملة الاشهارية حاضرة باش و عذرا على الاخطاء اللغوية و النحوية ... فأن نسيب السيد رئيس المجلس و عد أنه يعطي لأستاذ الايتود لأبنه المصون باش يصلحهم :

The Normallandien Dream

Ah ? .. vous counissi un payi qui , machaa allah , vous etes vente legumes et le lendemain tu deviens milliardaire ? c’est Normalland

Ah ? vous counissi un payi qui ,machaa allah, vous ne payer pas impot si vous etes l’ami de la famille du gouverneur de Normalland … que dieu le garde … (chez nous et pas forcement chez lui) et si vous ouvrer ton bouche ils redressement , redressement jusqu’ ce que tu t’ennuie (lin tfed en arabe). C’est Normalland

Ah ? vous counissi un payi qui, machaa allah, en epousant princesse tu deviens roi ? oui … c’est la verité je te jure sur la tete de maison de la mekke … ca m y arrivé a moi ! … oui c’est Normalland

Toi … Normallandais qui brule et qui est méchant et sale .. normalland te dit filaman .. quel soulagement (malla ra7a)

Toi … Normallandais qui vient avec devise et qui veut vivre a Normalland , hé ben , tu n as pas de quoi me faire jurer , Tu es bienvenu et si en plus tu fais mic mac et tic tac fil sac .. avec nous … hé bien dans ce cas tu es double bienvenu (mar7abtin)

Venez nombrous … Normalland vous aime beacoup !